Aiquile llaqtapi, Común Pampa ayllupi charanku llamk’aypi qhichwa simi apaykachaymanta.

Abstract

Kay yachay qillqaqa Aiquile juch’uy llaqtapi, Comun Pampa ayllupi ruwarikurqa, astawanqa charanku ruwaq yawarmasikunawan llamk’akurqa. Kay k’uskipayqa astawan ñancharisqa karqa: imaynata charanku ruwaypi qhichwa simita rimanarikunku, ima qhichwa rimaykunatataq kay llamk’aypi riqsinku. Chaypaqtaq, kimsa charanku ruwaq yawarmasi ukhupi ñawpaqman thatkichikurqa. Kay llamk’ayqa “runap kayninta mask’akipay” layata purispa ruwakurqa. Chayraykutaq Común Pampapi kawsayninkumanjina charanku ruwaymanta k’uskipakurqa; charanku ruwaqpa kayninmanta, t’ukuyninmanta, yachayninmanta ima willaykunata tantakurqa. Willaykunata tantanapaqtaq, chunka iskayniyuq tapuykunata, jisq’un qhawakipaykunata, juk qutu ch’aqwatawan ruwakuspa karqa; kay qutu ch’aqwataqa suqta charanku ruwaqkunawan ruwakurqa. Chaymantataq, kay k’uskipay ruwaypi tarisqaymanta khuskikun. Astawan allinta jap’iqakunanpaq suqta laya chayaykunamanta riqsichikun: yawarmasi ukhupi qhichwa simi rimanakuy, charanku ruwaypi qhichwa rimaykunata rimay, qhichwa simimanta t’ukuriyninku, Comun Pampa ayllupi mitmay rikukusqanmanta, charanku ruwaypi musuq aylluta paqarichiymanta, chantataq charankuwan llamk’aypi musuq ruk’awikuna apaykachakusqanmanta riqsichikun.